Жаттасам да бір Алланың сөздерін

08 июль 2019, Понедельник

463

Жаттасам да бір Алланың сөздерін,
Сайтан маған үйретіп ед өзге ілім.
Періштенің лебізіне мас болып,
Өбуші едім Ібілістің көздерін.
Күнәһар да, әсфия емес,
Білсеңіз – мен кезбемін.
Айкезбемін.
Кезбемін...
Күндерімде Күнге апарып халықты,
Түндерімде мекен еттім табытты.
Таусылмайтын кездесу мен қоштасу,
Бақыт менен қашудан да жалықты.
Сізді көрдім.
Сезімім бе, сорым ба?
Қаны тамған өз жүрегім – қолымда.
Өзіңізге келіп тұрмын, Жалғызым,
Өмір салған ұзақ жолдың соңында.
Мен әлемге мұндай болып келмедім!
Жоғалайын...әбден, әбден
ластануды күткенше...
Тіл қатыңызшы!
Су беріңізші?
Шөлдедім...
Су емес, жо-жоқ, у беріңізші,
бүйткенше.
Соңымда менің өлеңім қалса болғаны,
Қуанбасым хақ қалқиған қалақ тас қалса
Қуанарым хақ, жырдың үстіне жас тамса,
Сіз үшін басқа, бақытты өмір басталса.
У беріңізші?!...
У беріңізші бір тамшы,
Бір кезде мені сүйгендігіңіз рас болса.

Талқылау